داستانۆ دڤه براڵه‌ی
گێڵناوه ئه‌وسا دڤێ براڵێ بیێنێ که هه‌رڤێ پاڵوو هه‌نترینیه‌نه زه‌مینشا بیه‌ن و چاگه گه‌نمێشا کاڵه‌ینه و به وره‌ته‌ی گه‌نمێ ژیوه‌ینێ . یۆشا که گه‌وره‌ته‌ر بیه‌ن ژه‌ن و زاوڵه‌ش بیه‌ن و ئه‌وشا هه‌ڵای ژه‌نیش نارذێنه . وه‌روو ئانه‌یه که زه‌مینه‌کێشا پاڵوو یۆیه‌نه بیێنێ وه‌ختوو خه‌رمانی هه‌رشه‌وێوه یۆشا چه‌مذاری هه‌رڤێ خه‌رمانه‌کاش که‌رذه‌ن . ئا شه‌وه که نۆبه‌و برا کۆلاله‌که‌ی بیه‌ن وه‌ختێو نیمه‌شه‌و یاوان و که‌س نه‌بیه‌ن پاگه‌نه، وه‌روو وێشه‌ره واته‌نش : من پیه‌یوی بێ ژه‌ن و یانه‌نا و کڵفه‌ت بار نیه‌نا و وه‌ی که‌رذه‌ی زاوڵام نیا مله‌وه به‌ڵام کاکه‌م ژه‌ن و زاوڵه‌ش هه‌ن و مشیۆم فره‌ته‌ر جه من خه‌رج که‌رۆ . جا هۆرسه‌ن هۆر جه خه‌رمانه‌که‌و وێش برێو گه‌نمێش به‌رذێنه و که‌رذێنه‌ش سه‌روو گنمۆ خه‌رمانه‌که‌و کاکه‌یش . شه‌وێ دمه‌ینه که برای گه‌وره لاو خه‌رمانه‌کاوه بیه‌ن ، وه‌ختوو نیمه‌شه‌وی ئاذیچ لوان فکرێره و واته‌نش : من ژه‌نیم ئارذێنه و زاوڵێم هه‌نێ و شۆکروو خوای هیچم که‌م نیا به‌ڵام ئی برا گۆلاله‌مه هه‌ڵای ژه‌نیش نارذێنه و په‌ی ژه‌ن ئارذه‌ی و یانه رێک ڤسه‌ی پووڵ و پاره‌ی فره‌ته‌رش گه‌ره‌کا . جا هۆرسه‌ن برێو جه گه‌نمه‌کۆ وێش به‌رذێنه‌ش و که‌رذێنه‌ش سه‌روو خه‌رمانوو برا گۆلاله‌که‌یش . گرذ شه‌وێوه ئینه کسمشا بیه‌ن تا وه‌ختوو ڤره‌ته‌ی گه‌نمه‌کێشا . جا ماچۆ خه‌ڵکوو ده‌گاکێ سه‌ره‌شا سڕ مه‌نه‌بێ چانه‌یه که ته‌نانه‌ت ئا ساڵێ که به‌ریات که‌م بێ و وارانی که‌میچ وارێ و گه‌نمێ که‌مه بێ، ئا دڤه برا هه‌ر، ساڵ به ساڵ خوا فره‌ته‌رشا دێ پنه . ئینه ئانه‌یه میاڤنۆ که ئه‌گه‌ر به دڵپاکی جمیه‌وه و هه‌رمانه به دڵپاکی که‌ری خوایچ مجۆ ملته‌ره و عالته‌ر مارۆ وه‌ره‌وه په‌یت .
سه‌رچه‌مه : سرزمین قصه‌ها ، اسماعیل زرعی
هۆرگێڵنای جه فارسی به هه‌ورامی : عبدۆڵڵا حه‌بیبی
فهرههنگی - ئهدهبی