رۆ زوانی ئه‌ذایی
ئا گــــڕ و گاڵـــــــه بۆ به کــــۆ
قه‌تــــــره ئاوه‌ن بۆ به جـــــــۆ
شـــــه‌وه زه‌نگـــــه‌ن بۆ به رۆ
*** مه‌رحووم باقی سه‌فاری ***
رۆ زوانی ئه‌ذایی به گردوو ئاکه‌سا که ورکه‌شا " زوانوو ژیوای " شانا و خه‌فه‌توو زوانه‌که‌یشا موه‌را و په‌ی نه‌فه‌وتیایش قۆڵێشا هۆر که‌رذێنێ پیرۆز بۆ . به‌یدێ با پێوه‌ره قۆڵێ هۆرکه‌رمێ و ماناو ئا شێعرۆ مه‌رحووم کاک باقی سه‌فاریه که‌رمێ به هه‌ره‌قه‌تی .
ئه‌چی رانه یه‌رێ چێوێ بنه‌ڕه‌تیێ " وه‌رپه‌نگێ " نێ په‌ی به هه‌ورامی نویسته‌ی :
1- په‌ی کێ منویسمێ : ئینه هینوو وه‌ختێویا که ماچمێ وه‌رده‌نگوو نویسته‌که‌ما که‌ما ، ده‌ی قه‌ذش چێشا ! با برێو وه‌ختێ به زوانوو دڵیما بنویسمێ هه‌رچه‌ن که مزانمێ ئانێ که مواناشه‌وه که‌مێنێ . خۆ دنیا مه‌وڕۆ !
2- چێش بنویسمێ : هه‌رچی مه‌ی دڵته‌وره ئانه‌یه بنویسه ! هه‌رچی جۆرێو مه‌ی دڵته‌وره ، چوون ئیمکانش نیا یۆ به زوانێو غه‌یره‌ز زوانوو ئه‌ذاییش چێڤێو به‌ی دڵشه‌وره!. ئێمه ئه‌ننه عاذه‌تما نه‌که‌رذه‌ن به زوانوو وێما بنویسمێ ئا چێوه که مه‌ی په‌یما په‌ی نویسته، زوو وه‌روو وێماره هۆرش گێڵنمێوه به زوانێو ته‌ر و ئه‌جۆما جه ئه‌وه‌ڵه‌وه حه‌ر پاسه ئامان په‌یما جه حاڵێوه‌نه که پاسه نیا .
3- " زوان " ! : ئی که‌لیمێچه فره‌و وه‌ختا بۆ یاگۆ قڕه و مشه‌ی . وه‌شه‌ویسا " زوانی هه‌ورامی " به پاو ئانه‌یه که هه‌زاران ساڵێ بیه‌ن و قسێش پنه کریه‌ینێ و " ده‌سوور زوان " ی جیاکارش هه‌ن ، زوانا . هیچ که‌سیچ به پاو تاریفوو زوانی جه زوان ئه‌ژناسه‌کا مه‌تاڤۆ ئینه‌یه ره‌د که‌رۆوه . به‌ڵام بڕێو وه‌شه‌ویسی پاسه مزانا ئه‌گه‌ر واچا هه‌ورامی زوانا ئێمه جه " کورد " ی جیای بیمێوه.به‌ڵام پاسه نیا . وه‌شه‌ویسا ! من به نه‌ته‌وه " کورد " ه‌نا و پانه‌یچه شانازی که‌روو و ئه‌گه‌ریچ واچوو زوانم هه‌ورامیا هیچ زه‌ره‌رێوه‌م نه‌ذانه‌وه ئانه‌یه‌یه که " کورد "ه‌نا . مشیۆم ئینه‌یه په‌ی وێما سه‌له‌منمێ که " نه‌ته‌وه " و " زوان " دڤێ چێوێ جیه‌ینێ . تازه په‌ی ئا وه‌شه‌ویساچه که ماچا هه‌ورامی " له‌هجه " ن ماچوو : ده‌ی قه‌ذش چێشا با پا له‌هجه‌یچه بنویسیۆ . با نه‌فه‌وتیۆ .دیسان : خۆ دنیا مه‌وڕۆ .
*** عه‌بدوڵڵا حه‌بیبی ***
فهرههنگی - ئهدهبی