گلێره‌وه‌بیه‌ی فه‌رهه‌نگی جه شاروو مه‌ریوانیه‌نه
رۆ په‌نجشه‌ممه‌ی 4 وو چێڵکڕوو 1391 ی رۆجیاری گلێره‌وه‌بیه‌یوی فه‌رهه‌نگی جه گلێرگاو فه‌رهه‌نگی ئێداره‌و رانموونی شاروو مه‌ریوانیه‌نه لوا راوه . ئی گلێره‌وه‌بیه‌یه که به ئه‌رکوو ئه‌نجۆمه‌نوو رۆجیاری و به یاوه‌ری ئێداره‌و فه‌رهه‌نگ و رانموونی شاروو سه‌وڵاوای و به به‌شداری شاعێرا و نویسه‌را و که‌سایه‌تیه فه‌رهه‌نیاو هه‌ورامانی و کوردستانی که‌وته‌بێ را په‌ی قه‌درنیای و به‌رزگێرته‌ی هه‌رمانه فه‌رهه‌نگیه‌کاو دوێ نویسه‌ر و هۆرگێڵنه‌ر و په‌یجۆرکه‌رێ هه‌ورامانی ئاغایان ئه‌حمه‌د نه‌زیری و ئه‌حمه‌د مۆحه‌ممه‌دی رێک ڤزیابێ .
مه‌راسێمه‌که جه سه‌عاتۆ 9 سه‌رساحبی به قساو ئاغه‌ی فیروز عارفی ده‌بیروو گلێره‌وه‌بیه‌که‌ی ده‌سش پنه که‌رد . باسه‌که‌و ئاغه‌ی عارفی سه‌روو ئێژانه‌و ئی جۆر هه‌رمانا بێ و سه‌روو ئانه‌یه که چی مشیۆم ئێمه تا ئا یاگێ که پنه‌ما کریۆ قه‌دروو که‌سایه‌تیه فرهه‌نگی و ئه‌ده‌بیه‌کاما گێرمێ . شۆنیشه‌ره ئاغه‌ی سه‌مه‌دی ره‌ئیسوو ئێداره‌و فه‌رهه‌نگ و رانموونی سه‌وڵاوای خێرئامای مێمانه‌کاش که‌رد و کاک ئاسۆ بۆکانی شێعرێش وه‌نێوه و دماو ئاذێچیه‌ره په‌نێلوو ئه‌وه‌ڵوو گلێره‌وه‌بیه‌که‌ی به راوه‌به‌ری سه‌عدی نووری و به‌شداری ئه‌حمه‌د قازی و حه‌مه‌ڕه‌شید ئه‌مینی و سابیر عه‌زیزی لوا راوه . ئه‌حمه‌د قازی و حه‌مه‌ڕه‌شید ئه‌مینی سه‌روو ئه‌همیه‌توو زوانی ئه‌ذایی و هه‌رمانه گه‌وره‌کاو ئا دوه نویسه‌راوه باسشا که‌رد و سابیر عه‌زیزیچ جه باره‌و نه‌سری هه‌ورامیه‌وه وتاره‌که‌و وێش وه‌نشه‌وه.
په‌نێلی دوومه‌نه به راوه‌به‌ری هه‌ورامان به‌هرامی و به به‌شداری سه‌یێد مۆعته‌سه‌م هاشمی و دۆکتر ئێبراهیمی و ره‌ئووف مه‌حموودپوور و سۆهه‌یلا مۆحه‌ممه‌دی سه‌روو ویه‌رین نویسی و ئێژانه‌و هه‌رمانکاو ئا دوه نویسه‌ره‌یه و هه‌رپاسه هۆره‌وه‌گێڵنای باس کریا و مه‌تڵه‌ب وانیاوه.
دماو نیمه‌رۆیچ په‌نێلی یه‌رۆم به به‌شداری ئه‌حمه‌د نه‌زیری و ئه‌حمه‌د مۆحه‌مه‌دی و ئه‌سعه‌د ئه‌رده‌ڵان و عه‌دنان زه‌بیحی لوا راوه و سابیر سه‌عیدی و بۆرهان ئه‌خته‌ر شێعرێشا وه‌نێوه و فیلمیویچ نمایێش دریا و جه ئاخروو مه‌راسێمه‌که‌یچه‌وه جه برێو شه‌خسیه‌تیه فه‌رهه‌نگیا ته‌قدیر کریا .
شۆنۆ ئانه‌یچه‌ره بڕێو جه به‌شداراو مه‌راسێمه‌که‌ی جه په‌شتۆ ده‌گاو دزڵیێنه هه‌رنیشتێوشا بی و چاگه‌یچه سه‌روو نه‌سرنویسی به زوانی هه‌ورامی و راو یۆگێرته‌ی نویسه‌ره‌کا باس کریا.
فه‌رهه‌نگی - ئهدهبی