واران

ئینسانی گەورە بەرژەوەندی کۆمەڵگای فرەتەر گرنگا لاشۆ تا بەرژەوەندی تاکی،

کتاب آئین پژوهش دکتر امیرحسین آریان پور(کتاب راهنما)

 نویسەر: ژیار سڵامەتیان

7وو ئارگاو1392ڕۆجیاری. مەریوان

ئارۆ واچمێ نەواچمێ، بڕێ خەڵکما هەن، کە فەقەت هەن شۆنۆ بەرژەوەندی تاکی و بنەماڵەیی وێشۆ، و کۆمەڵاگای و خەڵکوو ئا کۆمەڵگایشە فەقەت پەی بەرژەوەندی تاکی گەرەکا، تا پاذیشاوە وێش یاونۆ بە چڵەپۆپۆ داروو یاوگەیش، بەڵام جە وەراوەروو ئی جۆرە ئینساناوە، بڕێ تەر ئینسانێما هەنێ کە لەشوو وێشا پسەو بەشێ جە کۆمەڵگای لەیەک مذاوە، و پا باوەڕەنێ کە زەرەر و بەرژەوەندی کۆمەڵاگاکەیشا پسەنە، زەرەر و بەرژەوەندی وێشا، ئیسە کە ئینەما پەی بەرکۆت، گەرەکما بڕێ خسڵەتوو ئی بنیاذماتا پەی بەر وزوو، بەرویروو(کتێب)ئائین پژوهش، نویسندە، دکترامیرحسن آریان پور سەروو ئی دوە بنیاذمەیە فرە قسێش کەردێنێ، جە پەلوو18دەو ئی بەرویرینە دوێ جۆر ئینسانێ جیێ کەرۆوە، بە دوێ ڕاوینێ جیاواز، کە ڕاونوو یۆیشا یا خاستەر واچوو یاوگەو یۆیشا، بەژەوەندی تاکین، و ئەویچشا بەرژەوەندی کۆمەڵگاین ویاوگەی گۆرەتەر، چی بەرویرەنە بە تەینوو تەسەل، نویسیان کە دیارکۆ فرەو جە ئا نەوەشیە دەروونیێ(ڕەوانی) کە مێنێ ملوو ئینسانیرە، فشارەکاو ژیواینێ کە ئینسان پەیشا بەها منیۆرە، هەڵبەتئینە سەلەمیان، کە ئا کەسانا کە فرەتەرین ئازارێ جەسەیی وڕەوانیەشا هەنە، ئا کەسانانێ کە بەرژەوەندی تاکیشا لاوە گرنگا یانی ئا کەسانا کە بنەماڵەیی یا فەقەت وێشا دلی کۆمەڵگاینە وینا و هەمیشەو دایێم پەی مەشغەڵەکاو ژیوای تاکیشا هەنێ شەڕوو مرافعەنە، ئی جۆرە بنیاذمێ هەمیشە فرەتەرین قوربانیشا جە جامعەنە دان، یانی ئەر ئارۆ وینمێ کە فرەو جە سەرمایەدارەکا بە نەوەشی، دڵی یا سەکتەی قەلبی، ڕەوان پەرێشانی و نەوەسیەکا تەری فرەتەر گیرۆذێ بیێنێ و خاستەرا واچمی ئا کەسنا کە بەرژەوەندی تاکیشا لاوە گرنگا، زووتەر چا کەسانا کە بەرژەوەندی کۆمەڵگایشا لاوە گرنگا، نەوەشێ گنا، و جە بەین ملا، جە لایێ تەرۆ، ئا کەسانا کە واراستێنێ، یا خاستەر واچوو ئینسانێ گۆرێنێ، هەمیشە بەرژەوەندی کۆمەڵگایشا لاوە گرنگا، هیچ وەخت پەی بەرژەوەندی تاکیشا نەکۆتێنێ شۆنە گمکێ، و هیچ وەخت پەی بەرژەوەندی بنەماڵەییشا یا خاستە وێقلەکاو ژیوایشا نەوەشێ نەکۆتێنی، چوون ئساسەن ئا چێوانە گرنگ نیا لاشاوە، و گرنگ ئانەنە کە چەسپیا هەرمانە گۆرەکێوە و ئی هەرمانە گۆرێ هەمیشە خزمەت بە ئەرزش و بەرهەمەکاو کۆمەڵگاینێ جە ئازادی، ئینسان دۆسی، حەق واسەی، شەڕ چنی زوڵمی، هەرمانێ فەرهەنگی گێرە تا هەرمانە پەی زوانی ئەذایی، ئینێ هەرمانێ گۆرێنێ کە ئینسانی واراستە هەمیشە پەیشا شەڕ کەرۆ، ئی ئینسانە چوون پەی ئەرزشتە کۆمەڵایەتیەکا هەرمانە کەرۆ، هەست بە  کەم بیەی یا نەبیەی، وێش نمەکەرۆ، ئینسانی واراستە سەعادەتمەندا، سەعادەت دێر جە بەین ملۆ، بەڵام ئینسانێ کە بەرژەوەندی تاکی لاشۆ گرنگا، بنیاذمێ ئێحساسین، و زوود گوزەریۆ وجە بەین ملۆ، ئا ئینسانا کە  بەرژەوەندی تاکیشا لاوە گرنگا، وەختێ جە یاوگەکەیشا شکەستشا وارد. زوو نابوودێ بانێ، یا با بە سگاریێ یا ملا شۆنۆ مادە ی هۆشبەریرە، ویا بە شێوێ وێشا کوشاوە، و سیستموو ئۆرگازمیشا جە کار گنۆنە، و دەزگاو پیشا نابوودە بۆ، وەختێ دەزگاو پی نابوو دە بیە، ئا بەشەرە یەواش یەواش تووشیاروو سەکتەی قەلبی مێ، بەڵام ئینسانی وارەستە هەمیشە شکەستەکاش چەنی کۆمەڵگاکەیش بەش کەرۆنە، و هیچ وەخت بە شکەست واردەی لەشش جە بەین نمەلۆ چوون ئا شکەستە فرە وردیتەرا جە یاوگەکەوە ئاذی، و بەشێ وێقلە جە شکەستەکەی پاذی یاوان، ئینسان ئەر گەرەکشا تووشوو ئی نەوەشیە نەبۆ مشیۆم، بەرژەوەندیە تاکیەکاو وێش بنیۆ قەراخۆ، و وێش بە بەشێ جە کۆمەڵگای لەیەک بذۆوە. ئینسانی گەورە ئا کەسەنە کە ئەرزشتەکاو کۆمەڵگایش نمەوزۆ چیر پا پەی بەرژەوەندی تاکیش، ویر کەردێ ئەر کۆمەڵگاکەتا وەش بۆ شمەیچ وەشێ کەرۆ، ئەر کۆمەڵگایچ خرابەبۆ هەزار جار وێت کوشیوە و بڕی، نمەیاوی بە ئامانجە تاکیەکات، پەس بە وەش کەردەی کۆمەڵگای تاوی یاوی بە یاوگەی پیرۆزیت،