مه‌حاكمه‌و به‌قوو قه‌فه‌سی/فه‌تحوڵڵا ره‌زایی
* مه‌حاكمه‌و به‌قوو قه‌فه‌سی:
حه‌ر پاسه گردێما مزانمێ به‌قوو قه‌فه‌سی جه لاو فره‌و كه‌ساوه به تایبه‌ت شاعێر و نویسه‌راوه، تۆمه‌تبارا به خیانه‌ت كه‌رده‌ی و برا كوشته‌ی و فره‌و چێوایته‌ریچ، به‌ڵام تا ئیسه هیچ كه‌سی مه‌حاكمه نه‌كه‌رده‌ن و هه‌ر كه‌س به مه‌یلوو وێش بۆختانێوه‌ش په‌ی تاشۆ و به تاوانبارش مزانۆ؛ و هه‌میشه و دایم جه گرد یاگێوه‌نه پێسه‌و نموونه‌و خیانه‌تكارێوی گه‌وره‌ی مژناسیۆ و نامێش بریۆ!
ئیسه بژنه‌ودێ مه‌حاكمه‌و به‌قوو قه‌فه‌سی:
شكات كه‌ر: ئاوه‌ز
تۆمه‌تبار: به‌قوو قه‌فه‌سی
قازی: ویژدان
تارێخ: 18/10/1392 ك.ڕ
په‌رس: تۆ تۆمه‌تباره‌نی به برا كوشته‌ی و خیانه‌ت كه‌رده‌ی به قه‌وم و كه‌س و كاریت؛ ئایا ئی تاوانێ گێری گه‌رده‌ن؟
جواب: نه‌خه‌یر. من بێ تاوانه‌نا و عه‌سڵه‌ن ئی تۆمه‌تێمه قبووڵێ نیه‌نێ و گردێ درۆینێ؛ هه‌رچن «بۆختانه پێسه‌نه خه‌ڵوزی یا سۆچنۆ یا سیاو كه‌رۆوه»؛ به‌ڵام تۆ ته‌ماشه كه‌ره بێ ئانه‌یه من مه‌حاكمه كه‌را و یا ویژدانیشا كه‌را قازی، بڕێو تومه‌تێشا په‌ی وه‌شێ كه‌رده‌نا، ئننه زلێ و قورسێنێ ئه‌ر بنیه‌یشا سه‌روو كۆ شاهۆیه‌و وه‌رگه‌شا مه‌گێرۆ و شه‌ق شه‌ق بۆ!
په‌رس: كریۆ بێ تاوانی وێت په‌یما سه‌له‌منی؟
جواب: به‌ڵێ، گۆش گێره تا باسوو بێ تاوانی وێم خاس شی كه‌روه په‌یتا، چن ساڵێ چی وه‌ڵته‌ر تازه جه هێڵه‌نه به‌رئامه‌بێنێ و هاگام جه دنیای نه‌بێ، بێ ڕه‌حم و مروه‌تێو ئاما منش جه ئه‌ذایم جیا كه‌رداوه و به ئه‌سیری به‌رداش؛ به زوانی ته‌ڕ كڵاوه‌ش نیا سه‌ره‌م و ده‌سه‌مۆ و ئالووذه‌و قه‌فه‌سیش كه‌ردا و ئاذ بی ئاغه و منیچ نۆكه‌ر، به باڤوو دڵوو وێش په‌روه‌رده‌ش كه‌ردا، و جه مه‌دره‌سه‌و وێشه‌نه ده‌رسش دانی و یاونانیش په‌نه، و گرد یاگێوه‌نه به زه‌ریفی و ده‌نگ وه‌شی من فه‌خر كه‌رێ.
ڕوێو جه ڕوا په‌ی ئه‌وه‌ڵین جاری ئاغه‌م وێش پێچاوه و تفه‌نگش كه‌رد شانه و قه‌فه‌سه‌كه‌و منش نیا دلێ تۆشه‌به‌رێوه چه‌رمێ و هۆرش گێرته و كه‌وت ڕا؛ فره‌ش په‌نه نه‌شی یاوه‌یمێ قه‌ذپاڵێوی وه‌ش و ڕه‌نگینی؛ ئاغه پیشێوش دا بڕێو چنیش شان و باڵوو منه‌ره و جگه‌رێوش كێشا و ئیجا قه‌فه‌سه‌كه‌و منش جه دلێگروو دره‌ختێویه‌نه خاس پۆژناره و وێچش لوا دلێ كۆڵیته‌كه‌یش و بێ ده‌نگ و چركه ماتینه‌ش دا؛ من سه‌ره‌م سڕ مه‌نه‌بێ جه هه‌رمانه‌كێش و حاڵیم نه‌بێ قه‌رارا چێش قۆمیۆ؛ وه‌ختێو خاس گۆشم دا به ده‌ور و به‌ریم؛ مذیه‌و جه كه‌شه‌كاوه ژه‌ره‌ژێ خه‌ریكێنێ به ئازاذی و سه‌روه‌شی موانای موانا و شاذی كه‌را؛ عاشق و شه‌یذاو ژیوای ژه‌ره‌ژه‌كاو كه‌شی بیانی و ئێتر چا وه‌خته‌نه ماناو ئازاذیم زانا و پێسه‌و شێتی زوو ده‌سم كه‌رد به وانای تا بزانام په‌نه و به‌یا جه ده‌سوو ئاغه‌یمه‌و نه‌جاتم بذا و منیچ پێسه‌و ئاذیشا جه سه‌ربه‌رزه‌كاوه به ئازاذی بژیڤوو؛ به‌ڵام وه‌ختێو ژه‌ره‌ژه‌كێ كه‌شی ئامای فریامه‌و تا نه‌جاتم بذا؛ وێشا گرفتارێ فێڵ و ته‌ڵه‌كه‌و ئاغه‌ی ڕاوكه‌ری بیێ و بێ گونا و تاوان گیانشا جه ده‌س دا و ئاغه به مه‌راموو وێش یاوا و خه‌تاكێچ ساویا سه‌ره‌و منه‌ره! به‌ڵام ئومێذم بێ كه هه‌رگیز «مانگه مه‌مانۆ جه په‌شته‌و هه‌وریه‌نه» و ڕوێو مه‌ی وه‌ره‌و بێ تاوانی من ڕۆشن بۆوه.
په‌رس: ده‌ی وه‌ختێو په‌ی ئه‌وه‌ڵین جاری زانات هه‌رمانه‌كێت بۆ به سه‌به‌بوو برا كوشته‌ی، چی درێژه‌ت په‌نه دا و چی بێ قه‌وڵی ئاغه‌یت نه‌كه‌ردت؟
جواب: ڕاسا، په‌یم ڕۆشن بیه‌بێوه كه ئاغه‌م منش په‌ی مه‌راموو وێش په‌روه‌رده كه‌رده‌نا، به‌ڵام ئێتر درێژه دای به هه‌رمانه‌كێ جه ده‌سوو مننه نه‌مه‌نێبێ و هه‌رچی كه‌رێنێ و كۆشێنێ نه‌تاوێنێ و نه‌زانێنێ چه‌نی وێم جه ده‌سوو ئاغه‌ی بێ ڕه‌حمیه‌و نه‌جات بذه‌و تا نه‌كه‌رۆم تێڵاو ده‌سیش په‌ی برا كوشته‌ی؛ ئاذ جه من ژیرته‌ر و زرنگته‌ر بێ و گرد جارێو به فێڵ و ته‌ڵه‌كه خه‌ڵه‌تنێم و هه‌رمانه‌كێم په‌نه كه‌رێ. حه‌ر پێسه‌و تلیاك وه‌ری عاذه‌تش په‌نه كه‌رده بێنێ و هیچ ده‌سه‌ڵاتێوم نه‌بێ.
په‌رس: چی جه ویروو ئانه‌یه‌نه نه‌بیه‌نی به جۆرێو وێت جه ده‌سوو ئاغه‌یته‌و نه‌جات بذه‌ی و بلی به ئازاذی بژیوی؟
جواب: په‌رسیارێوی عالت كه‌رد؛ ده‌ی وه‌ختێو من ته‌ماشه كه‌رێنێ و وینێنێ كه: شێر، پاڵنگ، فیل، داڵ، هه‌ڵۆ، باز و فره‌و گیاندارای ته‌ری پا گردوو توانایه‌و ئه‌سیروو ده‌سوو بڕێو جه ئێنسانه فێڵباز و بێ ڕه‌حمه‌كانێ و نه‌بێنێ جه ویروو ئانه‌یه‌نه وێشا نه‌جات بذا و یا نه‌تاوێنێ وێشا نه‌جات بذا! ئێتر من هه‌رگیز ئومێذێوم نه‌بێ بتاوو وێم ئازاذ كه‌روو؛ هه‌ڵبه‌ت چن كه‌ڕه‌تێو دڵم په‌و بێ به فێڵ و ته‌ڵه‌كه وێم نه‌جات بذه‌و، به‌ڵام ئاذ جه من ژیرته‌ر بێ و هه‌رگیز نه‌تاوام كڵاوه بنیه‌و سه‌ره‌ش و ئێتر وازم ئاورد و مه‌جبوور بیا پا شێوه درێژه بذه‌و به ژیوای خه‌فه‌تباریم و دڵم وه‌ش كه‌روو پی واته‌یه كه: «خوذا جه سولتان مه‌حمووذی گه‌وره‌ته‌را».
په‌رس: ده‌ی خۆ ئا شێر و پالنگه كه تۆ نامێشا به‌ری تاوانبارێنێ، چوون خیره‌تشا جه ده‌س دان و جه بۆنه‌و دوێ پێشه ڕه‌قاوه و تیكێو گوشته گه‌نایه‌و بیێنێ نۆكه‌ر و هه‌رمانبه‌رێ ئاغه‌یشا؛ پاسه بزانوو تۆیچ جه بۆنه‌و دوێ گوڵێ تاڵشكی و مشتێو دانێ، بیه‌نی تێڵاو ده‌سوو بێگانه‌ی؛ ئه‌ر ماچی پاسه نیا، ده‌لیله‌ت چێشه‌نه؟
جواب: هه‌ر چن تۆ ئا شێر و پاڵنگه‌یه ته‌خسیربار و بێ خیره‌ت مزانی، به‌ڵام به باوه‌ڕوو من ئاذێچێ بێ گوناینێ و جه وه‌راوه‌روو فێڵ و ته‌ڵه‌كه‌و فێڵبازه بێ ڕه‌حم و مروه‌ته‌كاوه هیچ ده‌سه‌ڵاتێوشا نیا.
به‌شه‌ر ساحیبوو ئاوه‌ز و عێلم و شعووریا، تا ڕادێو كه ده‌سه‌ڵاتش هه‌ن و متاوۆ: وه‌ڵاتێو ئاوذان كه‌رۆوه؛ ئاسمانه‌نه گێڵۆ؛ چیروو زه‌مینی وشكنۆ؛ سه‌روو ئاوێوه یانێ كه‌رۆوه؛ ته‌بێعه‌تی پارێزنۆ؛ ته‌یاره، ماشین، برق، ته‌له‌فوون و... وه‌شێ كه‌رۆ؛ قازانجش بۆ؛ خزمه‌تكار بۆ؛ و.... و به پێچه‌وانه‌یچه‌و متاوۆ: وه‌ڵاتێو وێران كه‌رۆ؛ ته‌بێعه‌تی جه به‌ین به‌رۆ؛ ئاسمان و زه‌مینی پیس و پۆخڵ كه‌رۆ؛ زڵم و زۆر كه‌رۆ؛ گێانداره‌كاو كه‌شی ئه‌سیرێ كه‌رۆ؛ و....
ده‌ی وه‌ختێو پاسه‌نه، ویر و زۆر و ده‌سه‌ڵاتوو من و گردوو ئاژه‌ڵه‌كاو كه‌شی جه وه‌راوه‌روو زڵم و زۆر و فێڵ و ته‌ڵه‌كه‌و ئێنسانه ناله‌باره‌كاوه، چێش متاوۆ بۆ؟ په‌ی دما جاری ماچوو من بێ تاوانه‌نا؛ به‌ڵام «گه‌رده‌ن جه مووی باریكته‌ر»، ڕازی به حوكموو قازیه‌نا.
په‌رس و جۆ ته‌مامیا .....
حكموو قازی: به پاو قانوونی؛ به‌قوو قه‌فه‌سی جه گردوو تۆمه‌ته‌كا، پاك و بێ گونا و بێ تاوانا و چی تارێخه‌و لای(18/10/1392ك.ڕ)، هه‌ر یاگێو بلۆ و هه‌ر جۆرێو مه‌یلشا بژیڤۆ ئازاذا و هیچ كه‌سیچ حه‌قش نیا به خرابه نامێش به‌رۆ؛ به‌ڵام ئاغه‌ی ڕاوكه‌ر تاوانبارا و مشیۆ بذریۆ ده‌سوو قانوونی تا مه‌حكه‌مه كریۆ و به‌سزاو وێش بیاڤۆ. ڕاسا «بێ گونا تا پاو داری ملۆ به‌ڵام هه‌رگیز مه‌لۆ سه‌روو داری»
فه‌تحوڵڵا ره‌زایی
فهرههنگی - ئهدهبی