واران

گەرەکما هەم پسەو کەسێ کە پەیوەندی وێڕاسم چنی کاک محەمەدی بیەن وهەم جە دلێنەو کتێبەکاو ئی نویسەرە پایەبەرزەیە ڕاوینیش جە بارەو ئینسانوو ئارۆ هەورامانی شی کەرووە. وەڵ جە هەرچێونە گەرەکما بڕێو سەروو ویروو باوەڕ وهەر پاسە شەخسیەتوو ئی نویسەریە باس کەروو. محەمەد مستەفا زادە پسەو ئینسانێوی ساحیب ویروو ئەندیشە ی، و تئۆریسیەنوو خزمەت بە وێ، ئینسانێ بێ  کە وێش جە هیچ کەسی کەم نەزانێ، و بە هەورامی بیەیشۆ بە تایبەت بە فەرهەنگوو زوانیشۆ پسەو ئێفتخارێو تەماشە کەرێ ، و هەمیشە پا ئاواتێ بێ کە ئینسانێ هەورامی پەروەرنۆ کە دلێ تەپوو تۆزوو دونیاو بێ هۆویەتیەنە ئینسانی هەورامی وێش جە دەس نەذۆ، و بە شێوێ وێپا، بنەماو ژیوای ئینسانی وێش بە زوان و فەرهەنگی هەورامیانە بەر وزۆ، ئاذ پا باوەڕە بێ کە خەڵکوو هەورامانی جە درێژایی ویەردەینە نیازشا بە هیچ  کەسی نەبیەن کە ژیونۆشا، و هیچ وەخت نەلێنینە چیروو بارمتەو هیچ  بێگانە، و ئینسانی هەورامی جە گردوو بوارەکاو ژیوایشەنە وێپا بیەن و تاوانش ڕاو ویرچەموو وێش بێزۆوە و ژیوای وێش بە سەربەرزانە بەرۆ سەر، هەمیشە داڵغەش ئانە بێ کە ڕایێ درووسە بێزۆوە وکەسایەتی ئینسانی هەورامی چا ڕاوە  یاونۆ بە کێبیەیێو کە  سەروو بنەماو ویرێوی هەورامیانە مەرزیابۆرە، هەر پاسە کە جە لاپەڕەو63کتێبوو زوانوو ژیوای باس سەروو ڕاو هەورامانی کەرۆ، و چی باسەنە ویرە تەنگ نەزەرەکا کێشنۆ بە تەنگنا، و ڕاو هەورامانی پسەو تاکە ڕاو نەجاتوو ئینسانی هەورامی جە وەرانوەروو ئا ویراوە کە دژایەتی چنی کێبیەی کەرا مارۆ وەروو باسی. هەر پاسە کە جە لاپەڕەو46ئی بەرویرینە باس جە وێ کەم وینای خەڵکوو هەورامانی و ئینسان هەورامی بە تایبەت ئا ڕۆشەن ویرە داعیە دارێ کە ئارۆ لوێنێنە دلێ سەنگەروو بێگانەکا وخەریکوو نویسەی بە زوانەکا تەرینێ، جە حاڵێنە کە زوانوو فەرهەنگوو وێشا بە گاڵتە گێرتەن، و پەی زەڕوو پارەی هەر کووجیەو کەلەبەرێنە وێشا مەڵاس دان تا زەربە بذانێ ئۆ شەخسیەتوو هەزاران ساڵەو فەرهەنگ و زوانوو هەورامی، مستەفا زادە وێ کەم وینای هەورامیەکا بە تنی مەحکووم کەرێ. و پەی نەجاتوو تاکی هەورامی چی تەنگەلێژە نەذامەتیە وێ پڕووکێنەریە  وێ کەم زاناینە، دوێ چێوێ سەرەکیێ پسەو ڕاگە نەجاتو ئینسانی هەورامی بەر وزێ، جە لاپەڕەو 59و84بەرویروو زوانوو ژیواینە، دوێ بابەتێ پسەو نەجاتوو تاکی هەورامی بەر وزۆ یەکەم. وێ ئاگایی پسەو بنەماو ژیوای تاکی هەورامی دووهەم. نویسەی بە زوانوو وێ و خزمەت بە زوانوو وێ پسەو کرێڵوو وەڵکۆتەو ئینسانی هەورامی ئارێ وەروو باسی. ئەگەر خاس سەرەنجە دەیمێ نامۆ یۆ جە بەرویرەکاش نیانش زوانی هەورامی و دونیای مدڕن، دیارا کە یاوگەش چی نام نیایە چێشا، یەکەم؛ ئاذ گەرەکشا بە شێوێو گنۆوە ئۆ پەڕوو مدرنیتەی و ئی هەستوو باوەڕیە دلێ دڵوو مەژگوو کناچەو کوڕی هەورامینە بنیاد بنیۆ کە ئێمەیچ تاومێ پسەو وێما ژیومێ، بە زوانوو وێما هەرچیما گەرەک بۆ و هەرچیما وەش بسیۆ متاومێ بە گاش بارمێ، و جە ڕاوینێ تەرۆ گەرەکشا ئا پەڕچینە وەش کریایا کە ئینسانی هەورامی پەی وێش وەشێش کەردێنێ، و وەششا پەی کەردەن، وڕنۆشا و جە ڕاوینێوی مدڕن وێ شناسە کەرۆ، و هەستوو جمنایرێوی وێپا بذۆ بە ویروو ئاوەزوو تاکی هەورامی و چی ڕانە یارمەتی دەروونشناسی و ڕەوانیش بذۆنە. ئەگەر پەرسە کەرمێ کە چی نامۆ یۆ جە کتێبەکاش نامە نویسەی بە زوان هەورامین، و ئی نامێ چە پەیامێش پەی ئینسانوو ئارۆ هۆرامانی هەن، بە دڵنیایوە جە وڵامەنە ماچمێ کە ئی پایەبەرزە چی بەرویرەنە ڕۆڵوو ڕەوان دەرمانێ گێڵنۆنە، کە گەرەکشا ئا تینوو هێزە هەورامیەیە کە جە پەیوەندی بەینوو ئەذاو تاتەی و زاڕۆڵەی و چنی یۆترینی زینە کەرۆوە و ئینسانی هەورامی سەروو ئی ڕێوە  وەزنۆرە و دڵە ورکەکاش جە وەشەویسیەکاش گێرە تا تەنگوو جەڵەمەکاو ژیوایش دلێ وێشەنە و بە زوانوو وێش حەلێ کەرۆ، تا خاستەر تاوۆ چنی ژیوای وێش سازنۆ. جە ڕاوینێ تەرۆ؛ مستەفازادە چی بەرویرەنە فرە سەروو، وەشەویسی و عەشقی ڕاسەقینەو کەسە نزیکەکا ورەفێقەکاش نویسەنش. ئینەیچ گێڵۆوە پەی ئا پەیلوایە کە پەی زوانوو فەرهەنگوو هەورامی بێش ئاذیچ چیوێ جوز نەرموو نیانی و پەیوەندی عاشقانە چنی نزیکەکاش چێوێ تەر نەبێ، خاستەر واچوو پەیامێ مذۆ بە تاکی هەورامی کە وەشەویسی بنەماو فرەو چێوەکانە.ئەگەر سەرەنجە دەیمێ. چی بەرویرەنە واتەهایێ بەکار بەرۆ کە سەرچەمەو فەرهەنگوو زوانی هەورامانی بە تەمامەن نیشانە مذا"واتەهایێ پسەو.ئازیزەکێم، نامەو ئەذای پەی کوڕی، بە دونیا ئامای زاڕۆڵا، هۆروەسەی دلێ مەیذانینە، نەورۆز و ساڵێ تازێ، دڵوەشی، لاونایۆ کەسەکا، قەذر زانای، ڕۆ بە دنیا ئامای" ئی واتێ پەڕێنێ جە وەشەویسی بە ئینسانەکا و گەرەکشا بە شێوێو پەیوەندی ئینسانەکا فرەتەر کەرۆ و شەتڵۆ کێبیەی تاکی هەورامی چا ڕاوینیوە کۆڵەکێ بنیۆ. مستەفازادە پسەو ئاخرین داواکاری وێش ئی بنجکێشە پەی خەڵکوو هەورامانی بنیاد نیا 'بنویسمێ بە زوانی هەورامی بوانمێ بە زوانی هەورامی کە ئاڵاو قەڵەمی نەبڕیاینە باڵاو هیچ مللەتێرە"  ئارۆ هەورامان پەنەوازش بە ئینسانهایێ ژیروو بە ئاوەزی پسەو ئی نویسەرە گۆرەیە هەن کە پەی هەورامانی و زوان هەورامی هەنگامێ پتەوە هۆرگێرا، گەنگامێ کە جە ڕاساو ڕاو خزمەت بە زوانوو هەورامینە بۆنە ئارۆ ئێمە جوانوو هەورامانی  مشتوو مڕما زوانی هەورامین و ڕاوینوو کەسانێ و ویرچەموو کاسانێو قبووڵ کەرمێ کە نویسەرێ ڕاسەقینەو زوانی هەورامینێ نەک کەسانێ کە وێشا خەڵکوو هەورامانینێ و بە زوانێ تەر منویساو و وێچشا بە داعیەداروو بوارە جۆراوجۆرەکاو هەورامی زانا، مشیۆم هەرچی زووتەر تاکوو هەورامانی ڕوە کەرۆ ئۆ زوانەکەیش و حورمەتوو ئێحترام بنیۆرە پەی ئا کەسانا کە چی ڕانە ژیوای بێ گەردوو پاکشا پێشکەشوو خزمەت بە ئینسانی هەورامیشا کەرد. نویسەروو هەورامانی مشیۆم یەرێ سفەتێش با "قەڵەمش هۆرامیانەن، وێپان، عەشق بە ئینسانی بنەماو ژیوایشا، ئەندیشە ڕانما و رێشا"

ڕاو ویرچەمی ئینسانی، نەمر مستەفازادەی بە زینەکەردەیوەی زوانوو فەرهەنگیووهەورامانی  یاونمێ بە  یاوگە